23. september 2023

​

Fimmta samsýning félagsins var haldin í Hallsteinssal í Safnahúsi Borgarfjarðar í Borgarnesi. Um 140 manns voru viðstaddir opnun sýningarinnar laugardaginn 23. september.

​

Sýningarnefnd auglýsti í mars meðal félagsmanna eftir myndum fyrir samsýningu ársins 2023. Hver félagsmaður mátti senda inn ljósmyndir af 1-3 verkum. Alls bárust 168 myndir frá 63 félagsmönnum sem þýðir að flestir sem sendu inn myndir sendu þrjú verk.

​

Á sýningunni voru 60 verk eftir 45 listamenn. Sýningarnefnd skipaði þriggja manna dómnefnd fagmanna utan félagsins með reynslu af vatnslitamálun og kennslu í faginu, til að velja inn myndir á sýninguna. Í þetta skipti skipuðu dómnefndina íslensku listamennirnir Guðrún Tryggvadóttir og Hlynur Helgason ásamt kanadíska listamanninum Michael Solovyev.

​

Sýningin fékk mjög góðar viðtökur og gestir voru ánægðir með þá fjölbreytni sem myndirnar sýndu.