Guðrún Steinþórsdóttir / Gurra er fædd og uppalin í Reykjavík. Listsköpun var í hávegum höfð í fjölskyldu Guðrúnar enda lagði faðir hennar, myndlistarmaðurinn Steinþór Marinó Gunnarsson, mikla rækt við teikningu og málun og mótaði áhuga Guðrúnar fyrir myndlist allt frá barnæsku. Hugur hennar hefur því lengi leitað í átt til sköpunar, náttúrunnar, sjónarhorna og samspils lita.

​

Guðrún nam tækniteiknun í Iðnskólanum í Reykjavík. Að námi loknu starfaði hún sem tækniteiknari hjá Skipulagi ríkisins í fjölda ára og síðar hjá Larvik Bygingeniörkompaniet í Noregi. Í Larvik var megin verkefni hennar að teikna uppdrátt að þeim hluta bæjarins sem fórst í miklum bruna út frá gömlum skipulagsheimildum.

​

Áhugi Guðrúnar á myndlist kviknaði enn frekar þegar hún var í námi við Fjölbrautarskólann í Breiðholti þar sem hún lagði stund á ýmsar listgreinar, m.a. módelteikningu hjá Ingibergi Magnússyni.

Árin 2015 – 2018 lærði Guðrún undir handleiðslu Derek Mundell við Myndlistarskóla Kópavogs og vakti hann með henni áhuga á töfrum vatnslitanna, flæðinu og þeim fjölbreyttu og krefjandi eiginleikum sem miðillinn býður upp á.

​

Hún hefur einnig sótt styttri námskeið hjá Keith Hornblower, Ann Larson Dahlin og Þorgrím Andra Einarssyni.