Katrín Matthíasdóttir útskrifaðist úr Ludwig-Maximilian háskólanum í München árið 1998 með M.A. gráðu í þýsku sem aðalfag og norræn fræði og heimspeki sem aukafög. Hún hóf ekki að mennta sig í myndlist fyrr en eftir að heim var komið frá Þýskalandi. Katrín sótti ýmis námskeið í olíumálun við Myndlistarskólann í Kópavogi á árunum 2007-2010 og hefur haldið einkasýningar m.a. í Gallerí Gróttu 2019/2020, Gallerí Fold 2018, Norræna húsinu 2017, Gerðubergi 2015 og tekið þátt í ýmsum samsýningum hér heima en einnig erlendis. Hún hlaut verðlaun í samnorrænu portrettkeppninni „Portræt Nu“ árið 2011. Katrín hefur einnig myndskreytt tvær barnabækur, „Húsið á heimsenda“ og „Ævintýrið um litla Dag“. 

Katrín leggur stund á figuratíva list en hefur þó reynt sig við ýmsar listaðferðir. Innblástur fær hún úr öllum áttum, maðurinn og umhverfið í öllu sínu rófi og samskiptum. Verk hennar hafa oft samfélagslega og umhverfislega skírskotun, þar sem hamfarahlýnun er áberandi.