María Gísladóttir er fædd á Ísafirði árið 1960. Við þriggja ára aldur fluttist hún ásamt fjölskyldu sinni í Lauganeshverfið í Reykjavík. Í uppeldinu hneigðist María fljótt að teikningu og hafði móðir hennar þar eflaust mikil áhrif en hún var mjög listhneigð. Uppáhaldsviðfangsefnið var íslenski hesturinn.

María stundaði nám á listasviði við Fjölbrautarskólann í Breiðholti og síðar fór hún í diplómanám við Myndlistaskólann í Reykjavík. María hefur búið víða um heiminn svo sem Ísrael. Egyptalandi, Sýrlandi og Króatíu. Þessi mikla heimssýn hefur mótað Maríu og haft áhrif á list hennar.

María starfar nú í Hlutverkasetri sem er virknimiðstöð. Þar er listadeild sem hún hefur nýtt sér og lært ýmislegt, svo sem vatnslitun, olíumálun, klippitækni, pastelmálun og margt fleira. Þar hefur hú notið leiðsagnar Önnu Henriksdóttur og Svöfu Einarsdóttur. Hún hefur einnig  tekið vatnslita  netnámskeið hjá Liz Chaderton og Tom Shepard. Einnig hefur hún tekið þátt í samsýningum Hlutverkaseturs og víða á höfuðborgarsvæðinu.

Hún er í Vatnslitafélagi Íslands.