Það lá snemma fyrir að Ómar myndi leggja fyrir sig myndlistina. Ungur sótti hann ýmis námskeið og síðar kom hann sér í læri hjá Bjarna Jónssyni, listmálara, sem þjálfaði hann bæði í teikningu, olíumálun og vatnslitun. Sem ungur maður tók Ómar þátt í ýmsum samsýningum og hélt einnig einkasýningar víðs vegar um landið. Örlögin beindu honum þó á aðra braut í lífinu en atvinnumennsku í myndlist. Þó hafa litir, form og línur verið hans lifibrauð alla tíð. Ómar vinnur sem grafískur hönnuður og rekur í dag eigið fyrirtæki ásamt konu sinni á sviði hönnunar og prents. Utan vinnu sinnir hann myndlistinni og eru vatnlitirnir honum kærastir. Hraðinn og spennan í vatnslitunum, eltingaleikurinn við ljósið, og hið óvænta heillar mig óendanlega, segir Ómar. Innblástur verka sinna sækir hann í sitt nánasta umhverfi, meðal annars í atvinnulífið, en þó einkum náttúruna sem hefur ávallt verið hans meginviðfangsefni.